|
Nos vola pus lon qu' l'an 2000.
Louke ! On nn'aveût portant djåzé tot plin di l'an 2000. Il est tot-a hipe oute di deûs
p'titès-annêyes qui c'èst dèdja roûvi, èvôye come les pus vîs
hoyous sov'nis. Portant on d'héve qui ci n'sèreût pus parèye, après l'an 2000.
Oûy, on nos vout fé creûre qui c'è-st-après on " 11 di sètimbe "
qui l' monde ni sèrè måy pus l' minme.
Portant, qwand on veût çou qui s' passe on s' dit qui c'èst todi l' minme djeû : lès
bruts dès botes èt dè canon tot avå l' monde, minme qui lès-Amèricains
avou leû d' mèye " bushî " come président ènnè r'mètèt
avou leû cuzins Anglès disconte l'Irak èt qu' nolu n' motihe discote çoula. Et tot ça
pou dès çans' ou pôr po dè pètrole.
Portant, la ossu, on nos dit qui c'è-st-a cåse di çoula qui nosse tére si rèstchåfe.
Minme qui l'an passé a stu eune dès pus tchôdes qu'on-z-åye kinohou.
Nèni, li monde ni toûne nin pus d'adrame qui d'vant l'an 2000. Mutwèt minme qui ci sèreût
co pé.
A Lîdje, ni n'èst nin mî nin pus. Vola qu'on vout côper a bokèts l' RTBF. Dimin,
fårè-t-i qui l'opèrå èt l'ôrkèsse alèsse prinde djîse
a Mons qu'èst - parèt-i - li capitåle culturéle dèl Walon'rèye ? Bin sûr
li fwèce dèl cîtè dè Doudou c'èst d'aveûr Di Rupo. Toto come Van
Cau po Charlèrwè. Nos-ôtes, nos-avans Dardène. I n'a nin photo come direût l'ôte.
Et Hapårt ossu, lu qu'a tchûzi d'èsse minisse èt qu'asteûre, c'èst sûr,
lès Forons nin r'vinront måy a Lîdje.
Mins tins, dji m' va têre. Sins qwè dji m' va co måvler ou fé dè måva song'.
Mins, come bon song' ni pout minti, dji so sûr qui, timpe ou tård, Lîdje si va rècrèster
po d' bon. C'èst qu'i-n-a dèdja tot pli dès sacwè qui r'mouwèt.
Djans, Tchantchès, tot n'èst nin dit.
Guy FONTAINE
|